Pausehofgebäät
vun Werner Grzeski unn Helmut Marnet
Du do owwe, iwwer de Stratosphär‘,
sei so gut unn heer mol her.
Im Moment laaft’s gar net cool,
ich hab Probläme in de Schul.
Als ledschdes Middel, ’s duht mer lääd,
hilft jetzt nur noch ä Gebäät...
Jeden Daag muss ich mich plooge,
mit irgendwelche bleede Frooge.
Neilich hab ich’s glatt vermasselt,
in Madde bin ich durchgerasselt.
Uffgerufe – nix gewisst,
am liebschte hätt ich mich verpisst.
De Klassestreber hot gelacht,
den hab ich glei zur Schneck gemacht.
Ich frog mich blos, wie kännt mer’s gligge,
des em Babbe hi’zudrigge…?
Mach, dass ich gude Node schreib,
domit ich jo net hogge bleib...
Wand’ mer hilfscht, duh ich verspreche,
ich werr niemand mehr verwesche.
Ich hoff jetzt blos, Du bischt ab heit
mein Kumbel unn uff moiner Seit...!!!
Amen.
© Werner Grzeski und Helmut Marnet 2008
www.einfach-so.net
 | 
